மாணவர்கள் பேஸ்புக்கில் கணக்கு தொடங்க தடை: தனியார் பள்ளிகள் உத்தரவு

கையடக்க தொலைபேசி பிரபலமானது போல் இப்போது இணைய தள பேஸ்புக்கும் வேகமாக பரவியுள்ளது. குறிப்பாக மாணவ—மாணவிகள், இளைஞர்களும், இளம்பெண்கள் ஏராளமானோர் பேஸ்புக்கில் கணக்கு தொடங்கி ஒருவருக்கொருவர் நட்பு ஏற்படுத்தி பேசி வருகிறார்கள். 

ஆனால் சமீபகாலமாக சிலர் போலி பெயர்களில் பேஸ்புக்கில் கணக்கு தொடங்கியும், வேறொருவர் போட்டோக்களை போட்டு மோசடியில் ஈடுபடும் செயல் அதிகரித்துள்ளது. 

இது ஒரு புறம் இருக்க மாணவர்களின் கல்வியையும் பாதிக்கிறது. பள்ளியில் இருந்து வீடு திரும்பும் மாணவர்கள் முன்பெல்லாம் விளையாட்டில் கவனம் செலுத்துவார்கள். பின்னர் வீட்டுப்பாடம் படிப்பார்கள். 

ஆனால் இப்போது வீடு திரும்பும் மாணவர்கள் பேஸ்புக்கில் மூழ்கி விடுகிறார்கள். இதனால் சோர்வு ஏற்பட்டு வீட்டு பாடத்தை கோட்டைவிட்டு மறுநாள் பள்ளி செல்லும் போது ஆசிரியர்கள் கேள்விகளுக்கு பதில் சொல்ல முடியாமல் திணறுகிறார்கள். 

இதையடுத்து பெங்களூரில் உள்ள சில தனியார் பள்ளிகள் மாணவர்கள் பேஸ்புக்கில் கணக்கு தொடங்க தடை விதித்துள்ளது. 

உடனடியாக மாணவர்கள் அனைவரும் தங்களது பேஸ்புக் கணக்குகளை அழித்து விடுமாறு உத்தர விடப்பட்டுள்ளது. 

இதுபற்றி பள்ளி முதல்வர் ஒருவர் கூறுகையில், ‘‘வீடு செல்லும் மாணவர்கள் பேஸ் புக்கில் அதிக நேரம் செலவிடுவதால் களைப்பு அடைந்து வருகிறார்கள். 

பெற்றோர்களும் அவர்களை கண்டுகொள்வதில்லை. நீண்ட நேரம் பேஸ்புக்கில் இருப்பதால் மறுநாள் பள்ளிக்கு வரும் போது சோர்வுடன் காணப்படுகிறார்கள். எனவே தான் நாங்கள் இவ்வாறு தடை விதித்து இருக்கிறோம்’’ என்றார். 

இது மாணவர்களிடையே அதிருப்தியை ஏற்படுத்தி உள்ளது. ஏற்கனவே நாங்கள் பேஸ்புக்கில் கவனம் செலுத்துவது இல்லை. இப்போது தடை விதித்து இருப்பதால் எங்களுக்கு பேஸ்புக் மீது ஆர்வத்தை தூண்டச் செய்கிறது என்று மாணவரான ஜோசப் கூறினார்.

viyapu thanks