மத்திய பொது பட்ஜெட்: மனிதநேய மக்கள் கட்சி கருத்து

Thursday, 28 February 2013 19:04

  

மனிதநேய மக்கள் கட்சியின் பொதுச் செயலாளர் எம். தமிமுன் அன்சாரி வெளியிடும் அறிக்கை:
இன்று மத்திய நிதியமைச்சர் ப.சிதம்பரம் அவர்கள் தாக்கல் செய்திருக்கும் நிதிநிலையானது சில வரவேற்புகளையும், சில அதிருப்திகளையும் கொண்டிருக்கிறது.
வேளாண் துறைக்கு 27,049 கோடி நிதி ஒதுக்கீடு செய்திருப்பதும், கிராமப்புற வளர்ச்சிக்கு 80,196 கோடியும், சுகாதார மேம்பாட்டுக்கு 37,300 கோடியும் ஒதுக்கீடு செய்திருப்பதும், தூத்துக்குடி துறைமுக மேம்பாட்டுக்கு 7,500 கோடி ஒதுக்கீடு செய்திருப்பதும் வரவேற்கத்தக்கது. நாடெங்கிலும் விவசாயிகள் தற்கொலை செய்து கொண்டிருக்கும் சூழலில் விவசாயக் கடன்கள் தள்ளுபடி செய்யப்படும் என்று எதிர்பார்க்கப்பட்ட நிலையில், அந்த அறிவிப்பு இல்லாதது விவசாயிகளுக்கு பெரும் ஏமாற்றத்தை அளித்துள்ளது.
மறைமுக வரி மூலம் 4,500 கோடி ரூபாய் மக்கள் தலையில் சுமையாக திணிக்கப் பட்டுள்ளது. விலைவாசியைக் குறைக்க உருப்படியான எந்த அறிவிப்புகளும் இந்த பட்ஜெட்டில் இல்லை. சிறுபான்மை மக்களின் கல்வி மேம்பாடு குறித்து நாடு தழுவிய திட்டங்கள் எதுவும் இல்லை.
உணவுப் பாதுகாப்பு திட்டத்தை செயல்படுத்த 10,000 கோடி மட்டுமே ஒதுக்கப் பட்டுள்ளது போதுமானதல்ல. இந்தத் துறைக்கு இதைவிட ஐந்து மடங்கு நிதி தேவை உள்ளது நிதி அமைச்சர் கவனத்தில் கொள்ளாதது ஏன் என்று தெரியவில்லை.
சாதாரண மக்கள் பயன்படுத்தும் செல்போன்களுக்கு வரி விதித்திருப்பது தேவையற்றது.

அன்புடன் (எம். தமிமுன் அன்சாரி)